一粥麵 (黃埔天地奇妙坊(第1期))

營業中

休息中

喺12期搬走咗之後就冇再幫襯因為唔係好就腳。今日星期日特登行過去一期試吓。食物方面都係大家樂出品，正正常常冇乜特別出色。去得一粥麵，比呢個價錢，咁當然唔會係諗住食半島出品。要提一提 D 阿姐啲服務態度，同12期嘅時候一模一樣 - 劣！keep到水準喎！都係咁差成日寸啲客！例如我叫冰鎮奶茶要加冰，見到張單打住走冰，咪問吓佢係咪真係會加冰，咁佢就好惡咁話走冰即係加冰囉你唔明咩！咁囉。咁我又真係唔明喎。跟住去攞嘢食，隔離位男士問佢點解一set海南雞飯要分開兩個tray。咁食物櫃檯嗰位阿姐又係冇禮貌地講話 = 因為一個tray放唔落。咁一來我又覺得唔使咁冇禮貌嘅，你解釋比個客聽咪得囉話晒都係客人。咁之後男食客就無奈地先攞一tray，轉頭再攞另一盤啦。咁我就喺度等緊嘅，就聽到食物櫃檯阿姐話你咁叻咪一次過攞晒囉。位男士就聽唔到嘅不過我聽到囉！係咪真係要用咁嘅態度對食客呢？