八百善 (已結業)

今日午餐揀呢間真係唔好彩，點知隔離枱更加唔好彩；話說午餐點咗鯖魚定食，等咗十五分鐘未上餐就追男侍應，佢回覆等多一陣燒緊，我就耐心等多陣；再過十分鐘仲未上餐，又再追，男待應就話就快有，有個女待應就話比男侍應知廚房有十個餐等出，過多五分鐘終於有得食，等咁耐條鯖魚已變暖，都唔知放喺廚房咁耐等咩。隔離枱同我一樣點咗鯖魚，其實佢仲早過我五分鐘落單，佢都一樣追男侍應，初頭答案都一樣；之後佢向男經理追單，男經理好敷衍話整緊等多陣，之後佢話已經追過一次仲未到，男經理再睇睇張單之後再望望自己隻錶就答「20分鐘啫，等下」，簡直唔覺得有誠意答個客人；就係呢個時候女侍應就話比男侍應知廚房有十個餐等出，男經理一路向廚房行一路好大聲話「咁趕時間去食麥當勞啦，唔好喺度食」；呢句話居然出於男經理把口，咁嘅服務態度非常差！