After You Dessert Café (已結業)

呢間泰國過江龍甜品店，我一直都好期待，據聞日日都排哂大隊，熱辣辣天氣排長龍，諗起都驚驚，所以久久都未的起心肝去品嚐。今次剛巧路過，可能時間尚早，門口竟然沒有人龍，就快快趣拉埋老公一齊入去幫襯，睇下係咪真係咁值得期待。其實價錢的確係少貴既，一個冰大約$150左右，Toast都要過百鬆蚊，不過偶一為之，可以試下既。鹹蛋黃蜜糖吐司 – 吐司好香脆，面頭的鹹蛋黃碎，再加埋一樽仔鹹蛋黃醬，真係夠哂邪惡，但又欲罷不能。再加埋兩球呍呢嗱雪糕同一大pat忌兼，研究過最佳食法係，一啖仔吐司加少量醎蛋黃醬，再加一啖雪糕，同時間塞入口，一次過品嚐哂多重口感，好好味。 芒果糯米飯刨冰 – 係芒果糯米飯同泰式奶茶當中，二選一，最後芒果糯米飯勝出。泰式奶茶，我下次先食埋你。刨冰都幾大碗，不過唔洗食得太急，因為d冰都製作得幾實淨，無咁容易溶。芒果糯米飯，配上芒果醬同椰奶再淋上面，真係好好食，食到中間位置，仲有芒果肉同埋糯米飯，對於唔太知情的人來說，即係講緊我老公，都幾驚喜架。