當下 (和富道) (已結業)

“當下PRESENT” 這間餐廳個名改得真好，活在當下這4個字聽起來很簡單，但是做起來卻十分不容易。而在今年的環境底下經營食肆就更為難上加難。而這北角分店更仲推行待用餐卷，幫助一些有需要的市民，免費享用佢地的餐食，這點真的令人好鼓舞。而我們2人一入到餐廳，店員都好細心咁幫我地量度體溫同拎埋搓手液比我地使用，這點溫馨動作無疑令到所有店內食客都更安心，值得一讚。我地今晚為左”當下”這點熱心，就決定黎幫襯一下。今晚點左精選晚餐A ~ 炭燒蜜汁頂級黑毛豬叉燒飯配水波蛋，B ~ 芝士汁海鮮焗德國農夫包。而主菜上之前例牌係有一餐湯和沙律的，是日餐湯是蘑菇濃湯，濃濃的蘑菇味，絕對不是罐頭湯的質素。芝士汁海鮮焗德國農夫包好大個，真係令我地好驚訝！農夫包入面係香濃既芝士汁，而在芝士汁當中就有好多海鮮，當中見到好多蝦、好多青口和好多蜆在內，入面啲芝士汁超正，用黎點包食一流；仲有伴碟的薯菜，蘆筍和薯條都好香脆。炭燒蜜汁頂級黑毛豬叉燒飯配水波蛋就賣相已經一絕，飯係用咗意大利飯，黑毛豬叉燒嘅份量就相當多，入口即溶，完全係用一個字可以形容 – 正！