幸福班戟 (已結業)

同好姊妹食完晚餐, 見個肚仲有位, 一於直落食甜品~ 朋友提議去曾經大熱嘅幸福班戟, 對上一次去啱啱夜晚8:30, 門口企左20人, 侍應話已經截咗龍下次請早.. 😅 今次都係差唔多時間到達竟然門口得兩 pair 人! 機會嚟喇飛雲~~ 果然等咗5分鐘已經入得, 我哋都唔堅持等卡位, 有位就殺! 幸福班戟 ($108) - 朋友堅持叫原味嘅幸福班戟, 好鬆軟, 蛋味好香, 即叫即整夠新鮮, 疏乎厘班戟特有嘅空氣感, 令我諗返起第一次喺日本同呀妹食嗰種幸福嘅感覺 ~ 熱朱古力班戟配自家製穀物 ($118)- 好鍾意食甜野嘅朋友叫咗呢個熱朱古力班戟, 齋睇個樣已經知道夠晒邪惡 !班戟上面放咗啲脆脆嘅穀物, 配上熱朱古力醬, 嘩~~~~ 食物質素都拍得住日本嗰邊, 唔會令人失望, 不過員工服務就麻麻, 唔知係咪佢哋忙咗一整日臨收工導致笑容欠奉, 態度一般... 俾人嘅感覺係想啲客快啲走趕住收工咁, 其實當時都未到佢哋店舖打烊嘅9:30 😅...