蔡潤記 (已結業)

都有半年多無黎幫襯喇，好掛住啲肥美可口既人氣豬粉腸啊，點知今次大失所望囉 ~豬粉腸，淨係同上年 5月張相比較，已經可以睇到有好大分別，質數急跌，今次真係整得麻麻，腍劈劈、唔彈牙、瘦猛猛、唔係肥美脹卜卜，放得耐仲有啲風乾左添，差呀。以前係肥美又嫰滑彈牙，搞咩呀？去左邊度呀。魚蛋鴛鴦加底加皮走蔥，保持水準，好好味呀，豉油湯底香甜美味，魚蛋魚味夠鮮夠濃，口感又滑又彈。魚皮齋食會有點咸，但放湯同吃就剛好，脆卜卜。麵嚥靭、河滑溜，時間啱啱好。阿姐們手腳比較慢，出貨好慢，所以要食好野真係要耐心等候。我最愛既辣椒油依舊辣味十足，既香且辣，味道鮮甜可口，越辣越想添食，夠刺激。魚蛋河走蔥，淨係食一碗大既魚蛋鴛鴦唔多夠喉，整多碗細河粉先得，滑溜幼河粉配埋香濃豉油湯底，再每一啖都加超香辣既辣椒油渣，勁美味呀 ﹗蠔油菜芯，免免強強喇，略為有少少渣，未夠鮮嫰。