光榮冰室 (厚福街) (已結業)

黃到發光嘅光榮冰室喺正我公司隔離，放lunch梗係要去支持下經濟圈。佢呢度裝修得好企理好光猛，手寫嘅每日Menu好有人情味。做野太辛苦太大壓力，決定叫個開心餐安慰下自己。其實佢個開心餐就係蔥油雞扒飯加三隻太陽蛋。打孖都唔夠，仲要係三隻，真係聽到都大快人心。佢個雞扒係炸過黎，炸到脆卜卜，入面啲雞油仲保住哂，撈哂啲豉油一齊食好香。仲要另外再有蔥油俾，油都係三款，加埋一齊點會唔好食。佢嘅太陽蛋隻隻都係流心，篤穿佢個蛋黃之後啲蛋漿流哂出黎個下真係好治癒，食蛋一定係要食半熟嘅！呢度嘅分量真係好多，飯底又多，蛋又多人兩隻，雞扒又大塊，係覆蓋哂成個碟。我食到一半都放棄左，諗住打包走啦，點知一裝完嘅分量居然同平時出面茶餐廳嘅外賣份量差唔多，我見到都呆左。用$55喺尖沙咀地區食到呢個分量加呢個質素，買一餐送一餐嘅感覺，抵到爛。