The Mast’ of Mozzarella & Co. (已結業)

去旅行好鍾意用「孤獨的美食家」精神揾嘢食，而家冇得去，就喺銅鑼灣發揮吓！路過一間餐廳，門口餐牌用意大利文行先，係咪又係嗰啲扮鬼佬開嘅貴價餐廳呀？都即管試吓啦～入到去見到一個似老闆嘅鬼佬，後來有個肥肥哋嘅鬼佬廚出過嚟揾老闆 👍👍😃。我哋叫咗一碟雞、薯仔糰子同甜品。全部味道都好好，可惜個雞過熟唔嫩滑，唔通食意大利嘢都應該食返大家最熟悉嘅嘢食好啲？🤔薯仔糰子係我其中一個超鍾意嘅菜色，軟熟薯仔麵糰加上超濃臭芝士😍😍😍😍😍😍😍，完美！不過菜色並唔係寫喺餐牌分類嗰幾頁，餐牌有隱藏頁！最後嗰幾頁係廚師推介，記得睇啊！碟雞嘅蕃茄醬非常惹味！橄欖令個醬更香，攞嚟當意粉醬都掂！如果個雞煮得好啲就更好。甜品賣相平平無奇，但原來酒味好香，有驚喜。走嘅時候先發現原來佢哋有個超小型工場，我唔熟悉呢啲機器，估計係整芝士啩。希望再有機會試埋其他嘢食，而家食店難做，要撐住呀！＊嗰日 lunch time 有幾枱客，外國人為主。餐廳嗰日冇套餐，冇下午茶餐，但反而兩點幾埋單時先多客。