擦餐飽 (已結業)

今日喺尖沙咀，終於親眼見到最近喺網上素食群組好Hit嘅素食美食車！果然好型！同一貫見到嘅素食Cafe文青形象好唔同，美食車反傳統用黑色做主色，再加上龍鳳火焰等Graphic，令架車有種火辣辣嘅街頭風味。我買左主打招牌菜「擦餐包」，同紅白藍莎利譚寶。擦餐包售價$28，就禁睇個包細細，估唔到裡面都幾多餡料。包屬軟身，裡面有素叉燒、素魚皮、生菜、羅勒等，口感有層次，味道適中唔太鹹唔太甜，街頭小食$28黎講我覺得唔錯，有飽肚嘅感覺。紅白藍$26，顏色鮮艷嘅漸層飲品，好適合打卡影相。我之前未飲過莎利譚寶，真係覺得有驚喜。本身以為杯飲品會甜耶耶，成杯糖水禁嘅，估唔到味道幾開胃醒神，行街時飲啱哂。我有Follow擦餐飽Facebook，知道佢地有僱用殘疾人士，真係非常有心，而且佢地仲係唯一一架賣素食嘅美食車，禁有愛心，真係要讚一讚依架外表邪惡、內裡溫柔嘅美食車。