掌壽司 (已結業)

下星期到農曆新年，要去駱駝漆工廈辦年貨，所以選定掌壽司食午餐，預早book 枱還享有9折優惠，坐低見到頂頭有一大盞燈，雕花的好靚，有品味。見到餐牌有多款午餐定食，生及熟食都有，另一推介餐牌介紹～即開廣島蠔刺身，所以叫了一隻試下，＄10咋，真係超值。比想像中大隻一倍，以為日本蠔好迷你添，厚肉，尤其帶子位鮮甜。午餐叫了～精選刺身定食$168 有成6款刺身，包括沙律，蒸蛋，味噌湯，白飯，甜品仲有餐飲添。刺身種類高質而且好新鮮，全是厚切，有油甘魚，左口魚，三文魚，帶子，拖羅及牡丹蝦。蒸蛋滑嫩內有蟹柳，三文魚腩超甘香， 油份甚足，冇諗過定食都有拖羅質素的刺身，油脂分佈均勻，好香魚油香味，入口即溶的口感。配上珍珠米食，米質煙韌夠香。蝦刺身超大隻，爽口，鮮蝦味濃少少黏口鮮甜。另一個叫了網燒黑毛和牛飯定食 $98，好似一座山丘既係紫菜、櫻花蝦、同漬菜，夾埋薄切既黑毛和牛，淡淡牛肉油香味，櫻花蝦帶脆口增加口感，牛肉呈紅色半生熟令牛肉更香更腍，飯內充滿醬汁，撈飯超開胃。甜品跟餐係雪米糍，係荔枝味。完滿呀！