富園海鮮酒家

營業中

休息中

行到佐敦道同彌敦道呢個位，搵嘢食就唔係好難，附近都有好多出名食店，不過我就唔鍾意食到又趕又逼，加上我又唔係遊客，無謂同人爭位，所以就去咗間就手，係正路口既佐敦薈裡面，揀咗間唔太起眼嘅酒樓，叫啲下午茶特價野慢慢自在食。燒賣正常舊式酒樓大小，不過咬開就知佢唔用絞碎肉，而係手刴豬肉，所以特別有咬口，味道略咸。雖然蝦細但反而好有蝦味。初時入去間酒樓舊舊地暗暗地，又望落唔太乾淨，一心只係坐耐啲對食物唔太有要求，唔打唔撞食到好嘢。至於腸粉同春卷，就不過不失，蝦腸皮做得唔錯，夠香夠滑，不過就無乜蝦。春卷就用左蝦膠去做，呢個就唔係好啱我口味。鳳爪排骨飯啲排骨就夠晒入味，而且最重要無鹼水味，去到呢度，我估點心師傅應該都係啲老師傅，先做到呢啲味道。呢個基本野做齊，蒜蓉炒過啲料先至釀，都係咸左少少。至於環境就唔好太在意，而且非繁忙時間都多人，要同人撘枱，而且人手不足處理時間要多少少，不過呢個價錢，又有咁嘅質素，算係咁啦。