不toast不快 (已結業)

之前去韓國旅行就食過唔少呢一種盒裝吐司，終於而家都可以喺香港食到啦，而且喺葵廣，好方便！叫咗個漢堡扒流心芝蛋吐司，呢度好貼心，餐牌都會寫明晒有啲咩材料係入邊！呢份入邊有豬柳蛋漢堡、蛋、椰菜絲、芝士、碎茄醬。佢個炒蛋做得好滑！麵包皮有用牛油煎過，所以食落好香口，而且係好鬆軟嘅。另外要咗份香蒜焗大啡菇蒜蓉吐司，蒜味好突出，啱晒重口味嘅朋友，而且啡菇好多汁！呢度仲有其他小食㗎，佢啲小食嘅名都幾有趣，就叫做一個三角關係，入邊呢就其實係墨魚餅嚟嘅。炸得好香脆，入邊嘅墨魚好足料。而且呢度嘅價錢亦都好相宜，又夠飽肚又抵食。呢度係落單即整，所以大家可能要等多一陣！但都係值得的。