佳信記 (已搬遷) 新店位置

第一次食呢間盆菜係年初一响別人屋企，見佢比起其他食過嘅盆菜吸引得多，真材實料而且好足料，暗暗記住佢。疫情肆虐唔想出街食，叫個盆菜返嚟分享更實際，今次已經是第三次食。今次訂嘅係8人盤菜，見佢寫18種材料。日本元貝一啲都唔細又夠腍，原隻花膠筒厚身又大隻，每人一隻，共有8隻。滿滿骨膠原，最受歡迎。海蝦好大隻仲粗過我隻手指，爽脆又鮮味。魚蛋大大粒彈牙，白切雞都好有雞味，花菇爽脆，芋頭酥腍，白蘿蔔夠入味，其他配料都好食。未拆包裝時堆砌得好高，分分鐘滿瀉出來，所以我哋將面頭嘅材料分開嚟裝。