彩翠軒酒家

營業中

休息中

太空館形馬拉糕、惹味排骨陳村粉、流心奶黃包同厚肉滷水鳳爪，係每次嚟的必食，馬拉糕尤其搶手，有糖香兼鬆軟，充滿舊式點心風味，幾次都係相機未食已被搶光。炸物力推外脆內軟炸豆腐同多餡咸水角。椒鹽魷魚比唔上新錦園出品；炸雞翼水準相當飄忽，時好時壞；炸雲吞咬落去，連隔離枱都聽到有幾脆，個酸汁清甜中帶微酸，兩者配合得非常好，略嫌雲吞太少餡；炸花枝餅夠彈牙，唔點醬汁仲好食。其餘精選有大大隻皮薄蝦餃，多蝦少肉，冇留意有冇十三摺；爽口牛柏葉份量多，漿糊汁冇影；山竹牛肉有腐皮，好彩唔係發水肉球。午巿仲有糖水送。食晏等點心，有時真係會等耐咗，最好揾先頭部隊嚟落單先。樓面店員點忙，都盡力加水、收碟同追點心，又幫手剪開點心方便些牙，讚。