翡翠拉麵小籠包 (已搬遷) 新店位置

今晚同兩位中學同學一齊食飯聚舊，其中一位提議食中菜，於是落腳點去左世貿既翡翠拉麵小籠包。星期六晚大約八點去到門口，三人檯都只係等第四張，都唔算好耐，好快就入座，仲有卡位坐添。由於大家諗住食完之後，會出外面再食甜品，所以只係選左以下五樣菜色：1. 燻魚論燻魚，一定會同最近幫襯既鑽石山夏麵館有比較。翡翠每件大小都會比夏麵館大少少，而且較少骨，不過講到全碟份量真係唔及夏麵館多，而且夏麵館既醬汁會比翡翠吸引。食最緊要滋味，所以都係夏麵館優勝少少。2. 菜肉雲吞湯一碗六粒，湯無味精算係唔錯，每粒菜肉雲吞都有一隻羹咁大。本來打算要小籠包，但係一籠四隻，三個人分唔勻，而家要個菜肉雲吞湯，分得勻仲有湯暖下肚，無揀錯。3. 四川擔擔拉麵問侍應有無得走辣，佢話無，頂多只係少辣。點知呢，原來都比我地所想既辣，兩位朋友食完一兩小碗之後耍晒手，無計，我地幾個都怕食到爆瘡或者喉嚨痛。相比起黎，詠藜園個湯底贏晒，翡翠呢碗只食到辣而食唔到香。侍應抵讚，打單個陣自動打埋「剪麵」，方便我地三個人分，呢樣夠細心。4. 上海炒粗麵粗炒又一次輸俾夏麵館，上次寫夏麵館食評時讚佢油而不膩，每條麵都有咬口，今次翡翠係食到一碗都係油。