Tomato Story (已搬遷) 新店位置

好食既野，真係少一間就一間。話說今晚行過灣仔，入左去呢間餐廳，情調十足，味道夠堅，但可惜原來老闆話做到月底。先講返D野食先，我地兩個分別叫左中東油鴨脾意粉+牛肋肉意粉。湯底來講，佢唔係出面鋪頭咁落蕃膏，純粹真係用蕃茄去煲，我地問過老闆，佢話佢想透過純味帶返出D蔬菜鮮味出來。的確，我唔多點愛食蕃茄都比佢吸引到，個湯真係鮮甜好飲。至於牛肋骨，肉質入口即溶，味道夠，同湯底十分夾。中東油鴨脾呢，真係配咩都一流，佢成功帶出意粉的味道，一口鴨脾肉，一口意粉，一味濃郁，一份實在的感覺，不知覺令人瞬間食清而不自知。由於今晚撞上老闆因面臨加租需休業而清潔店面，所以做埋我地張order就提早close。用餐期間，見到好多客人都敲門造訪，店主仲好好禮貌咁一一解釋，仲推介埋附近有咩好食比失望而回的顧客，呢一點真係在食店中好耐都未見過的一份真情。之後，同老闆傾多兩句，佢仲倒左兩杯私人白酒比我地，當為呢個因緣際會下能一嚐佳餚而乾杯。如果大家去開灣仔，記得趁月底去幫一幫襯，有心的小店不多，真的要多多支持。