創意廚房 (希慎道) (已結業)

一如以往，都係經過又肚餓，就入去叫咗個超值套餐食其實一入到去期待已經唔會太多，但係佢個蕃茄湯公仔麵真係令我不得不寫一篇食評佢呢個蕃茄湯公仔麵，雖然望上去感覺就係蕃茄加水加公仔麵，三樣嘢好似完全分開毫無關係，但係當我飲咗一啖湯之後整個感覺完完全全顛覆咗。佢嘅蕃茄湯，真係做到蕃茄濃湯嘅感覺，雖然佢唔結仲係好稀，但係蕃茄嘅味道一啲都唔會少，完完全全可以試到蕃茄嘅鮮味，同時亦可以做到一個麵嘅湯底。配搭埋公仔麵食，我可以講俾大家聽唔需要餸都可以好好滋味咁樣食完呢一個麵。其次佢新鮮即炸嘅豬扒，好香，外皮好鬆脆，完全做到外脆內軟嘅感覺，配搭埋蕃茄湯底食酸酸甜甜，令人一啖有一啖感想食落去。比較失色嘅，可能就係較為普通嘅炒蛋同埋厚多士。呢兩樣可以做到合格以上，但未令人難忘。可能係因為蕃茄湯公仔麵真係太出色啦。呢一間餐廳，我絕對會為咗個蕃茄湯再去食。