發記甜品 (已結業)

其實中式糖水好難煮得唔好食，不過偏偏十六少奶就喺深井遇到一間超難食嘅糖水舖，仲有幸食咗平生覺得最難食嘅兩款中式糖水：凍 芝麻糊同埋凍紅豆沙加湯圓。首先講嗰個凍芝麻糊，其實真係稀得好緊要，雖然口感好似有啲粗粒粒唔知係唔係芝麻嘅嘢，但係講真即沖嗰啲芝麻糊好似仲好食過佢咯！唯一可以讚係佢唔太甜 … 但係芝麻味亦唔見濃，整體嚟講，蒙住眼真係唔知食咗啲乜！之後紅豆沙加湯圓亦係經典！紅豆沙冇沙冇豆， 酒樓婚宴送嗰啲紅豆沙仲好食！湯圓個皮唔知點解好硬！好似雪藏雪到就嚟過期嗰啲湯圓！其實買超級市場急凍嗰啲湯圓煮，十六少奶都好有信心煮得好食過佢…當然我知道呢間甜品舖係食榴槤pancake起家嘅。冇問題呀！如果冇心機整其他糖水，咪買返pancake囉！唔好亂咁整啲嘢出嚟畀人食，浪費人哋啲錢，同個胃ｄ位啦！