北正宗 (已結業)

Food court食飯講求快同平，如果連質素都有埋就perfect啦。星期日新世紀大食代food court，一如既往咁多人，不過foot court turnover夠快，搵位唔難，只係搵食仲難，因為好多選擇。好耐冇食過越南嘢，今日就試吓新開嘅【北正宗】。【手切新鮮生牛肉湯粉】五十幾蚊，已經有大大碗粉，一碟生菜同春卷。本來唔expect有咩正牛肉，但睇一睇啲牛嘅色澤同紋理，咦？真係好似打邊爐食嗰啲二百幾蚊碟得嗰十幾塊嘅手切牛肉。浸熟少少試吓，果然係牛肉味勁濃郁，再加少少咬口，可以講係over expectation。除咗牛肉外，碗粉仲加咗好多羅勒，所以食起嚟好香口，好有越南風味。春卷味道都唔錯，咬落都仲算鬆脆。生菜新鮮，都有4-5片左右。買餐嗰陣，我見到餐牌有兩個連越南餐廳都未必有嘅菜式——【香辣鮮椰肉椰汁煮海螺】、【香烤法國鵪鶉】，心諗「food court餐廳咋喎，邊會整得好食丫。」不過食完呢餐後，覺得應該可以一試。