燒串煲 (已結業)

今日同2個朋友行完街，突然好想食串燒或者打邊爐。搵到依間燒串煲好似幾好，而且地點就腳容易去，旺角或者尖沙咀行完街過去食好近，好方便添。嚟到之後我地先點左佢地既串燒，然後先再點左個雞煲。叫左份羊架，估唔到小店燒到出嚟都好香，又唔會話太酥，肉唔會話太un難咬。有個朋友本來唔食羊，但見到都忍唔住試咗少少。跟著再點左份燒勝子，勝子上面鋪滿粉絲同蒜，本身海鮮夠新鮮已經夠汁，而且唔會話燒到出嚟啲粉絲同勝子又乾晒等等，師傅手勢好好。雖然食完我哋都意猶未盡，但因為仲有個雞煲，所以都係無再叫其他串燒。跟著就到個雞煲嚟喇！雞煲味道濃郁，又夠香，而且仲落足料添！佢呢度嘅一隻雞係比起出面嘅雞煲大啲，而且調味上面都有少少唔同，唔係好似出面啲連鎖店咁死咸。食完啲雞再加湯，佢又有平時打邊爐會有既料提供。我哋加咗一份手切肥牛同埋響鈴，三個人係食到勁飽，值得一題係嗰份肥牛都好重牛味。埋單每人唔使$200，而且環境夠舒適乾淨 ，有機會會再嚟食。