美味餃子店 (已搬遷) 新店位置

晏晝繼續清淡之旅，去開太子就嚟食吓餃子。中午時間好多人，堂食同外賣都多，老板娘加埋幾個伙計阿姐都做到踢晒脚。餃子得三款：木耳椰菜、白菜同韭菜肉餃，亦有車仔麵，不過配料種類都唔多。煎餃同湯餃一樣價錢，叫咗個木耳椰菜湯餃（細$18）加麵$4，個湯唔係味精湯，標明係野葛菜魚湯，飲第一啖覺得好似幾淡，但飲多兩啖就覺得好清甜，而且肯定無味精。餃子就幾大隻皮滑但饀料唔多，不過都有鮮味，睇住阿姐一路包，包好就即刻渌，梗係好食喇。聞說佢地D自製辣醬好正，雖然肚痛都要食少少，果然名不虛傳，夠辣又夠香，下次嚟要食番夠本。同檯有位大哥帶埋佢個外省老婆嚟食，佢老婆都話正，証明真係有料到。