立鮨 (黃埔天地) (已結業)

是日點咗以下三樣，本來想邊點邊食，但三文魚籽海膽大滿足迷你丼嚟咗已經大失所望。再加點火炙海苔三點及新鮮貝三味壽司，更係失望到極點，埋單就走。最後睇返張單先發現，12分落第一單，26分已經埋單，前後14分鐘，快過食快飯。三文魚籽海膽大滿足迷你丼圖片顯示個丼份量係充足，名稱亦自稱大滿足迷你丼，可惜細份到想喊，海膽份量連圖示一半都冇。飯嘅醬油反而非常多，最後個飯係勁鹹濕！！！真係字面上又鹹又濕。火炙海苔三點同新鮮貝三味壽司同時係送到，店員提醒先食海苔三點，但其實海苔喺當刻已經唔脆，質感同我埋單之後食拉麵個碗邊嗰塊海苔一樣。咁係為咩要提醒我哋食先？唔通唔快啲食，塊海苔會滴水？三件中其中一件係火炙蝦，火炙就火炙啦，加牛油燒？咁點解唔整茄汁蝦？蒜蓉開邊蒸丫不如。搞創意料理就應該學吓明將。新鮮貝三味壽司細！帆立貝大概兩片手指公指甲咁。另一兩件我已經冇心情食，同行嘅食咗。另外就係鹹濕飯。其實材料新鮮真係需要咁多醬油？我唔係專家，留俾其他人思考。