舊機場車仔麵

營業中

休息中

啟德平平地想食餐飯，除咗兩餸飯同大快活無咩選擇，呢間車仔麵喺啟德居民group好多負評，不過聽人講不如自己試，最多一心以幾十蚊試伏心態去試吓…見啲人話貴，但4餸麵$58真心覺得抵，叫咗墨魚頭、豬紅、蘿蔔、豬手油麵加辣菜甫，唔駛講第一啖一定試過湯先，飲咗一啖唔覺口渴，但個人覺得可以到再濃味小小。墨魚頭唔係周圍有得食，所以點嚟試吓，食落都幾爽口唔韌，但唔算好驚喜。豬紅蘿蔔係平日必點，因為一試就知間嘢得唔得。呢個豬紅都入味質感好，唔會有啲成舊膠嘅感覺；蘿蔔偏淋可以爽小小，但味道都算甜無渣。最欣賞反而係豬手，南乳入晒味唔會死咸，炆到仲有小小咬口，滿口骨膠原最正。辣菜甫唔算好辣，加喺清湯可以吊味，下次會試吓辣汁。整體嚟講，價錢抵、食物質素亦對得住有餘，起碼唔會死咸口渴樣樣餸同一個味，值得回頭。