小茶堂 (已結業)

間中都會去買台式飲品，不過唔係特別沉迷，而家好多呢類飲品都要排隊，尤其是過江龍，有D試過都不外如是，反而我幾鐘意呢間小茶堂。本地飲品店，位於好景果邊，人來人旺都幾旺場，但不至於要排長龍，所以我行過都會買來飲。今日喺呢頭打完邊爐，好口渴，就買杯解解渴，等左幾分鐘就到手，好有效率。menu都係主打台式飲品，有水果茶呀，鮮奶類等，比較受歡迎就係黑糖飲品啦，個個都手拎住一杯，又可以打卡呃個like。價錢唔貴，廿零蚊有交易，而且大部分飲品都可以自己揀甜度同冰量，都好彈性，始終唔係個個受得甜或者鐘意凍飲。我揀左一杯水果茶，要微糖啱啱好，因為我自己預左會偏甜D，好飲呀，入面有百香果啦，多數水果茶都會有，始終味道比較明顯；另外有橙同蘋果，最細心係佢地將橙肉榨左，所以唔會淨係飲到百香果味，有少少似香橙綠茶，幾清新解渴，而且有茶味。個人認為點水果茶微糖以下都可以，本身水果都有甜度另外點左我最愛嘅抹茶鮮奶加黑糖珍珠，呢杯真係好正，推薦。抹茶味濃郁回甘，唔需要特別調較糖度，我點少糖都ok，完全唔洗怕甜。搖勻後就係一杯非常香滑嘅抹茶鮮奶，混合得好好。而最讚係佢地嘅黑糖珍珠，珍珠有彈性，而且有黑糖香氣。