泰越概念 (已結業)

因為我同朋友都住港島，出黎食飯通常都喺銅鑼灣食。今次朋友介紹我黎呢間V.Thai。今日奇餓，我地叫左好多嘢食，我最中意既係最唔起眼既雞肉泰式炒河。睇落平平無奇但佢既蛋香好出眾。條條河粉都上晒色上晒味，好夠火喉惹味得黎又帶啲小小辣好過引。第二推介既係佢香茅燒原條魚。一出場，好香。店員仲好細心幫我打開個魚皮。成條魚用厚厚既鹽包住燒，皮好香，啲肉比想像中多汁，軟熟。魚肚燒完都漲卜卜係因為入面充滿啲香草，好足料，所以真係成條魚都好香，老實講我無乜點到佢跟上既汁，哈哈。其實仲有食青咖哩同椰汁雞湯。同樣好足味足料。值得一提既係我嗰晚無乜話好口渴，證明佢地真係真材實料唔係靠味精。環境幾好，位置闊落又唔嘈，想同朋友靜靜地食個飯放心下係個好選擇。