餃里 (悅湖商場) (裝修中)

紫菜鮮肉餃（湯）紫菜味好突出，係第一次食到呢個餡料嘅餃子，味道好特別，會想再試的。湯底有豬骨味，但唔知係咪店主會用嚟煮水餃，有小小麵粉味，不過都唔影響我飲晒個湯，而飲完都唔覺口渴，估計無用味精，試得過！香荽鮮肉餃（煎）食前會諗，會唔會食到成口香荽味，點知食落又幾有驚喜。佢係會有淡淡的香荽味，但又唔會太搶。而且餃子煎得好好食，個底係脆，但個皮依然咁滑，餡料都係咁多汁，幾好！餃里撈麵用上佢秘製手工菜脯撈埋，建議撈返小小佢餃子嘅湯食，有多少少汁就啱啱好。泡菜（生餃）有陣陣嘅泡菜味。店主好細心咁印埋烹調方法，所以喺屋企都可以煎到脆底皮滑多汁餃，只係無店主煎得咁靚。整體嚟講，啲餃子都大粒足餡料，有唔同口味。最讚係啲餃子皮好難得咁滑，係少有食到嘅口感。亦見到店員即場包餃子，就知佢係真正自家人手製作喇！最緊要係餃子汁同菜脯都好好味，係值得一試嘅餃子店啊！