有魚

營業中

休息中

放工無所事事，即興約咗哥哥食飯，諗唔到食咩嘅我哋喺荃灣行咗一陣，最後揀咗二坡坊嘅呢間小菜館。店面唔算大，大概有八張枱左右，但枱同枱之間空間夠，感覺唔會好逼夾。除咗小炒同湯粉麵飯之外，仲有烤魚、酸菜魚、羊腩煲、雞煲同火鍋，選擇都幾多，我哋掙扎咗好耐，唔知食小菜好抑或食酸菜魚好，最後揀咗酸菜魚。等候食物期間，老闆好友善咁送上剛炒好嘅花生，又香又脆，仲帶住微溫。落單後老闆問我哋想用火爐上定好似一般酸菜魚咁，煮好用大盆上菜，我哋揀咗前者，酸菜魚一上枱非常有震撼性，除咗份量非常大之外，我哋冇諗過係原條魚上，而且仲要係原條石斑，湯汁帶有濃濃嘅酸菜味，味道微辣，非常開胃，同一般食到嘅酸菜魚好唔同，但的確係另有一番滋味。石斑經過半煎炸，表層酥香，內裡軟滑，咬落肉質結實，配上酸辣湯汁更添鮮味。除咗石斑之外仲有唔少配料，娃娃菜夠鮮嫩，而且吸收哂湯汁嘅味道，非常惹味。雲耳大大件，口感清爽，配上酸菜湯汁亦係唔錯。魚嘅底部仲有粗薯粉，佢嘅薯粉口感同一般食到嘅唔同，傳統薯粉口感偏向軟糯煙韌，呢度嘅薯粉口感清爽，而且煮得耐都能夠保持口感。本來想叫多少少嘢食，但見到酸菜魚嘅份量之後即刻卻步，配搭白飯同汽水已經好足夠。