養生糊甜品專門店 (已結業)

好耐冇食傳統中式糖水喇！老闆兩夫婦以前喺北角開店，糖水出名真材實料，但可惜因為健康關係結業。而家喺炮台山依邊重新開舖，當然要支持下啦！小店有十多款糖水供應，有啲更加有凍熱選擇，店家好細心每款糖水都有介紹食材功效，等你可以揀一款最適合嘅。黎到當然要試下招牌芝麻糊啦！黑白芝麻由人手炒香再用石磨磨製，芝麻味香濃離遠都聞到，入口順滑，係街坊推介必食嘅。夏日炎炎絕對需要飲碗綠豆沙清熱解毒！海帶綠豆沙好足料，啖啖都有起沙嘅綠豆同爽口嘅海帶，食落唔會好甜，感覺都健康啲。