東京一番 (已結業)

見團購咁平所以買左，結果真係伏伏地。先講服務態度參差，長期漏單，枱面碟晒一碟碟食完既碟冇人收，加茶小姐話你可以出去自己加茶，一邊幫客人加茶一邊咁講。魚生師傅超唔衛生，見到兩個男師傅一路整一路流汗，仲有師傅一路整壽司魚生摸風扇！衛生程度認真麻麻！加上佢地既魚生放晒一個櫃切好晒，感覺好唔新鮮，魚生選擇好少，永遠同點既數量唔同，多數俾少。無左既魚生講都唔講聲，要問侍應點解冇俾，佢走去問先知冇晒個隻魚生，what??!仲有所謂推介既虎蝦泰國酸甜辣醬，問個侍應有冇，佢答未整。好啦轉頭問第二個，佢話佢都唔清楚。喂大佬，問下你老頂啦，客人問完佢，佢即刻話佢都唔清楚，咁都有既，今時今日咩服務態度！隔離大枱食客仲慘，落四五次單都走單，問侍應，侍應一味淨係話你地再落啦，落極都冇好慘！侍應就話，我都唔知嫁，交左單啦。好野喎，做得咁難頂唔好做啦。綜合：魚生選擇少唔新鮮，冇咩味道。得希靈魚比較好味。壽司多款但味道一般。芒果壽司加辣醬好怪！雪糕選擇少，用黎掘雪糕既匙巾浸落既水望落好似好耐冇人換過，衛生一般，所以試都唔夠試。一次團購就夠喇，冇謂再試。是日星期六晚上去到，依然冇滿座，長此下去，只有祝佢地好運喇！