鳳城酒家 (已搬遷) 新店位置

十天長假最後一天,遠征中西區探望已有三個幾月大的契仔.順便來個簡單茶聚,一諗,就諗到上環鳳城.近幾年鳳城酒家版圖幾何級數擴大,由昔日北角同太子兩間老店,升至老銅已有兩間,上環一間,蔡瀾一間,連老廟附近一樣有間在左近.認真黎講,北角同太子,才是老店,其他只係分拆出來的.如果要四四正正吃餐晚飯,點都會去太子間老店.水準有所保証.明珠果間,新開張時吃過一次,完全唔掂.講到飲茶,又唔會咁執著,但求就腳.反正中午時段,都係賣點心.同埋,我地得三個人,食唔到幾多.最多叫碟特價炒粉麵.七個點心,一碟炸菜魚崧炆米,都係百二銀,在周六下午時段黎講,真係好平.點心都係一貫水準,粉果就一定必吃.鳳城名菜之一,無論蒸或炸,一樣好吃.飲茶無問題,晚飯嘛?略有保留,或者下次會在上環,來個鳳城飯局後,才能蓋棺定論.不知道有無食友有興趣?