藝穗會Colette Artbar (裝修中)

附近睇完展覽覺得肚餓就一於入去食，冷氣好涼，夏天熱辣辣入去真係好爽，或者都有戶外位任你揀。食午餐，入面係buffet形式嘅，仲有個bar係隔離嗌嘢飲，食嗰日係亞洲菜色，不過都有好多款麵包呀蛋糕同沙律揀，齋麵包都已經有四、五款，然後搽麵包又有四種可以揀，有兩款芝士又有蒜蓉牛油同Cream Cheese，比起其他得普通牛油嘅buffet真係好有心。講翻主菜，我都係事後睇翻先知係素食buffet，我依啲平時唔係食開素嘅覺得好健康，但係又唔會好似印象中嘅素食餐廳咁無聊，好驚喜，真係唔好因為見倒係素食就卻步，一定要入去試試。全餐飯我最鍾意佢個奶油燉菜，奶油嘅味道啱啱好，好順口一個唔小心就食左幾轉，而且全部餸都熱辣辣，見住佢一兜清曬另一兜即刻上。環境都好舒服好乾淨，有景睇，入面又有唔少畫同自製嘅裝飾，食飽之後同朋友坐左陣吹下水影下靚相。總括成個經歷都係開心嘅，以後經過中環會再去。