老馮茶居 (大棠路)

通常新嘢都係好睇唔好食嘛！呢間元朗扮舊點心鋪又幾好食喎。鵪鶉蛋燒賣懷舊點心首推鵪鶉蛋燒賣，燒賣裡面有好足料蝦肉，非常爽口。而且沒有太多肥豬肉，所以一啲都唔油膩，連食兩粒都唔滯。鵪鶉蛋就唔係太大粒，膽固醇嘅朋友唔需要太擔心！千層糕又係懷舊點心，依家唔係度度食得到。一層層食得出有好香嘅椰絲，糖冬瓜，咸蛋黃。面頭就係好鬆軟嘅中式麵包皮。整件感覺偏甜，半件起一件止。四寶滑雞扎唔算懷舊款(因為真懷舊果啲係用淮山包)，不過用腐皮都幾好食。係件雞肥咗啲，同埋蟹柳太粉(似超級市場牌果啲平版蟹柳)，整體嚟講都合格。八珍糯米雞餡料唔算多，有咸蛋黃同埋雞翼。唔似酒樓Style，比較似大X活果啲糯米雞。但勝在飽肚，男士不妨點一隻。其實仲食咗叉燒腸，好好味。太肚餓忘記影相。笑臉有一半是給環境的，真係裝修得幾有趣，屋邨茶檔其實仲有好多fans，唔知香港其他區會唔會有新分店呢？！