星林居雲南米線餐廳 (已結業)

話說今晚想食啲有湯嘅米粉類食物，咁喺尖沙咀I square附近就搵吓有乜嘢食 ，見到呢間星林居就入去試吓啦。我哋兩個人各自嗌咗一碗米線。一碗係油麥菜豬軟骨雲吞小辣小窩米線 ；另一碗係油麥菜腸仔肥牛小小辣小窩米線。因為第一次食呢間舖頭，所以唔知道佢菜係另上的，所以油麥菜就變咗有兩碟。加上我哋都鍾意食芫荽，呢間嘢幾好，多芫荽唔使另外加錢。ps:我個碗仲要左多芽菜。講番碗小窩米線：豬軟骨未算好腍，雲吞皮多個餡，我食到一半個雲吞皮都冇食到。另外一碗腸仔同肥牛就正常發揮。小辣同小小辣 試咗其實都冇乜辣味，下次如果試應該會試吓中辣。順帶一提，佢個小小辣以上係會有少少肉碎的，但其實放咗落碗米線度又幾香，食嘅時候多少少層次感。侍應一上菜嘅時候，一睇成張枱就好綠色，哈哈，係好健康嘅青BB晚餐。要讚嘅係 佢另外上嘅油麥菜好啱我食，清清地一啲都唔油。兩個人要咗一杯凍檸茶，因為我一個人通常都飲唔晒。 晚餐2位一共$140。等我下次再去試吓佢其他餸先。