影片
更多
2014-04-29
3956 瀏覽
以前老一輩啲人，都鍾意晌米缸貼張紅紙「常滿」，唔使多解釋都明，信相依家後生嘅都無乜邊幾個會咁做。如果有得揀「常滿」，我就較喜歡「知足」常滿嘞，正所謂知足常樂，如果經常對咩事都咁知足，毋須事事比較，心靈都會輕省好多。今晚，約番幾個之前一齊去大馬旅行嘅朋友，聚聚兼吹水，就番大家中間位，選址「常滿雞煲」，因為知足，唔需要「常滿」（撐得飽飽），最緊要「嚐滿」（食得滿意） ！荃灣區都算小弟出入較多嘅區域，所以，都知道眾安街、二陂坊、三陂坊開咗唔少雞煲專賣店，好幾間仲人龍不絕，不過，是夜目標唔喺雞煲喎，而喺另類火鍋，一向鍾意試新嘢，當然想食得有特色啲啦 。室內裝修唔太花巧，水泥牆、木枱木櫈，簡約得嚟又帶番少少地踎味道，唯一特色就喺啲雀籠吊粒。有卡位，有圓枱，亦有6-8人嘅大長枱，感覺卡位最舒服，因為較為闊落 。主餐牌方面，A4紙底面兩版睇晒，一面喺湯底、小菜及牛肉火鍋配料，另面喺蔬菜、海鮮、丸餃、豬肉……等等火鍋配料。此外，仲有幾個細餐牌，包括冷盤、小食及飲品，因為唔喺任食，所以打算等齊人先開爐，又為免餓親朋友，先試個小食，食住等。 清酒煮翡翠螺 $68 個翡翠螺加咗少少木魚碎，所以，
荃灣區都算小弟出入較多嘅區域，所以，都知道眾安街、二陂坊、三陂坊開咗唔少雞煲專賣店，好幾間仲人龍不絕，不過，是夜目標唔喺雞煲喎，而喺另類火鍋，一向鍾意試新嘢，當然想食得有特色啲啦 。室內裝修唔太花巧，水泥牆、木枱木櫈，簡約得嚟又帶番少少地踎味道，唯一特色就喺啲雀籠吊粒。有卡位，有圓枱，亦有6-8人嘅大長枱，感覺卡位最舒服，因為較為闊落 。
主餐牌方面，A4紙底面兩版睇晒，一面喺湯底、小菜及牛肉火鍋配料，另面喺蔬菜、海鮮、丸餃、豬肉……等等火鍋配料。
此外，仲有幾個細餐牌，包括冷盤、小食及飲品，因為唔喺任食，所以打算等齊人先開爐，又為免餓親朋友，先試個小食，食住等。
清酒煮翡翠螺 $68 個翡翠螺加咗少少木魚碎，所以，送到嚟見啲木魚碎郁郁吓，就好似呼喚緊遲到嘅人快啲嚟。一客翡翠螺有8粒，除番開都算抵食喎，而且，啲螺有淡香清酒味，唔嗆喉，螺肉都幾爽甜，試得過。如果喜歡食大蔥嘅朋友，不愁寂寞，內裡都有唔少添。
招牌鮮人參藥膳鍋 $128 嘩，好大鍋呀？但估唔到喺奶白色，不過，一飲就知點解，原來加咗腐竹，好香豆味。撈一撈，亦發覺有唔少藥材，但啲名就唔喺太識，不過亮點就喺條原條鮮人參喇。此外，仲有啲豆腐、豬紅……等等，味道甜甜哋，較濃豆香味，藥材味反而唔犀利，所以怕藥味嘅人食依個鍋都應該無問題。
打鞭爐唔停咁滾，扯乾水就必定架喇，但店方有個幾好嘅安排，成渣清湯放晌枱邊，有需要自斟，唔使吓吓等人嚟，都幾方便 。題外笑話，有個朋友嚟到，問咁快叫咗渣咩嘢飲，咁嘅色嘅，雪梨茶呀？唔使講都知我哋點答佢啦 。
跟住，就講講火鍋料嘅質素，今晚大家狀態唔差，都算喺試咗唔少嘢，即刻去片同大家分享。鮮炸響鈴卷 $38（全份） / $22（半份）
響鈴做得頗大條，店員話喺師傅即做鮮炸，所以，專燈試一條就咁食，入口微熱，脆得交關，不過就會味淡啲；再試一條湯灼，輕輕一拖，響鈴吸咗少少湯汁，食落有點豆香，喂！真喺唔錯喎 。
韮菜餃（左）．瑤柱白菜餃（右）$38餃類單點$30 / $35，雙拼就$38，多選擇又幾特別，而且又標榜自家制。望落外皮又真喺睇得出喺自家制，仍有點濕潤，唔會雪死過咁「乾爭爭」。味道以韮菜餃突出啲，因為一啖食落滿滿韮菜香，而瑤柱白菜餃都食得少少瑤柱絲，算喺無欺場，外皮薄薄，但有啲黏牙 。
一級桂花蚌 $98 食海鮮最重要喺能品嚐到其鮮甜味，估唔到桂花蚌跟依款湯底幾夾，灼過嘅蚌肉集鮮、甜、爽一身，若果食重口味嘅雞煲或麻辣湯鍋，應該口感有餘，鮮味有所掩蓋。
手打鮮墨魚滑．手打鮮蝦滑 $73 如果散點每款要$68，不如加多$5要雙拼。兩者都做得有水準，魚滑打得爽彈，入口鮮甜，無論墨魚滑定蝦滑，其本身嘅味道都突出，甚有貨真價實嘅感覺 。
沙巴龍躉肉 $108 龍躉魚片外觀有光澤，新鮮度不成問題，灼過嘅龍躉肉，魚肉好滑，不過，因為邊位仲帶有少少魚皮，而魚皮入口韌淨，覺得去埋皮口感仲好。
常滿六合丸 $78 丸類標明自家手打，部份甚有特色，如黑椒象拔牛肉、手打黃金墨魚丸…，又喺店長推介，都令人幾想試，不過，店員推介咗另一招牌丸「常滿六合丸」，話喺由甘筍粒、鮮蝦肉、象拔蚌、蓮藕粒、蟹籽、墨魚打成，又真喺幾有吸引力。老實講，小弟就難以食出每樣材料味道，但口感就絕對有層次，彈牙中有嚟自筍粒同蓮藕粒嘅爽口感，亦有啲嚟自蟹籽同象拔蚌嘅咬口，實在又幾有特色 。
極品手切肥牛 $298 雖然朋友唔喺食肉獸，但打鞭爐如果無肥牛又總喺若有所失，加上佢哋對食都有少少要求，所以，極品手切肥牛應該合佢哋心水。牛肉色澤紅潤亮麗，油脂唔太多，但分佈平均，師傅手勢好切得夠薄。輕輕一灼，好嫩好滑，肉味十足，可謂質味兼優，正 ！有時有啲嘢，真喺一分錢一分貨。
梅酒千層肉 $78 依道喺全晚我哋大家一致選為嘅驚喜菜，五花腩切成薄片捲起，再浸話梅花雕酒。雖然啲腩片睇落確實幾肥，不過，入口感覺好唔同，話梅味非常突出，好入味，所以油膩感近乎全消，而酒味則淡淡散發，有種餘韻嘅感覺 。
雜菜籃 $32蔬菜類由$20-$38，唔想煩食乜，雜菜籃就簡單一啲，兩、三樣菜插滿一大碗，隨隨意意。
津路烏龍茶 $15順便講講飲品，啤酒類別都有幾多款，仲要嚟自唔同國家，不過，我哋當中無人好啤酒，所以都喺飲番啲大路嘢。朋友貪得意，揀杯凍檸茶，檸茶喺店內自家沖，唔喺現成貨，不過，都喺一般般；小弟就要樽烏龍茶，解解膩吖嘛！
講起隊酒，相信貓頭鷹時段，有唔少客人晌度食雞煲，隊啤酒，飲大咗而嘔吐之事時有發生，故此，見到店方都作出溫馨提示：「如在店鋪內或廁所嘔吐，一律收取HK$300清潔費 。」實際到頭嚟執唔執行就唔知，不過，真喺為免影響他人，大家都確要敬請自重 。
雖然周圍好多枱都有食雞煲，但我哋食完又唔覺有話沾滿一身味，一來店內樓底高，二來室內通風系統唔錯。整體嚟講，食材用料不賴，當中又不乏特色，配合埋殷勤服務，令是夜重聚日大家食得稱心滿意 。
題外話/補充資料：
Citibank有9折優惠
(以上食評乃用戶個人意見 , 並不代表OpenRice之觀點。)
張貼
