Olive Cafe (新領域廣場) (已結業)

放工約咗朋友喺荃灣食嘢，敘吓舊，仲話知道有間食石燒嘅餐廳幾好食，而且仲不收加一。咁佢就帶咗我嚟呢度，離開地鐵站只有約5分鐘路程。我哋叫咗$128食肉獸薄餅，$160美國極黑毛豬300g，$12熱檸水，諗住兩個女仔全部share嚟食；晚餐仲包沙律、是日餐湯、白飯，自助無限量供應😁。薄餅上邊有香腸同埋肉粒，中間部份烤焗得比較軟熟，外皮就脆脆地，食落幾香口。黑毛豬喺塊熱石板上邊，非常新鮮熱辣辣，幾好豬味，仲有多種醬汁可以自己選擇。好耐冇見朋友，一路傾偈一路食石燒，仲不停講笑，笑到哈哈聲，覺得食物特別味美，仲好彩餐廳音樂夠大聲，蓋過我哋兩個大笑姑婆嘅笑聲；我哋過咗一個愉快嘅晚上。