豐味蒸食

營業中

休息中

今日同朋友想食蒸野，經過見到呢間食店，即製石磨腸粉好吸引，而且新開不久，雖然地方唔算大，座位較少，但環境光猛乾淨。招牌豬脾腸粉 $25即叫即製好新鮮熱辣，石磨腸粉透薄好滑溜，醬汁調味岩岩好，咸鮮有蒜香，微咸帶少少辣，豬脾肉質鬆化，連帶豬皮都好有膠質好彈滑。豬潤腸粉加蛋 $25豬潤腸粉較少見，熟度剛好，豬潤用料十足，鮮嫩無渣帶點爽，口感一流，腸粉加蛋更滑更多份蛋香味。豉椒排骨蒸飯 $30排骨份量多，非常入味且肉質嫩腍，蒸飯最正，蒸得飯粒爽口好咬，又保留飯香，配肉同加左醬油真係食唔停口，蒸飯仲送是日例湯，清甜滋潤好味。豬肉鮮蝦蒸餃 $20餡料夠多，蝦肉一整隻大大粒，仲好爽彈，餃皮頗薄有彈性，透出內餡好吸引。韭菜豬肉蒸餃 $18韭菜非常香，肉同菜比較適中，咬落仲好多肉汁。豆漿 $10有得揀凍/熱，同埋無糖/甜，岩岩渣起唔會好凍，豆味都突出，豆漿好香滑。總括，價錢超值，食物份量足，味道亦好，即叫即做夠新鮮熱辣，環境乾淨，感覺很有人情味。