譚仔三哥米線 (形點 II)

營業中

休息中

朋友又約食譚仔，今次就去形點間三哥，下午茶都好多人，不停有人走又有黎，個門口堆滿人等嘟針卡，個部電話勁唔聽使，個個都係嘟唔到，煩。特登黎試個新湯底，見咁多人話好食，就叫呢個肥牛鹿茸菇砂砂湯米線，肥牛同鹿茸菇係一定要叫嘅餸，唔可以唔要，只能夠加餸，對於唔食牛肉嘅人嚟講就冇辦法叫到呢個湯底，除非你要走牛但係照收你牛肉錢囉。講返個湯底，個湯底係幾好味，有沙嗲味甜甜地咁，所以叫五小其實都唔辣，第二次食叫三小個湯就好味好多。啲肥牛都幾垃圾，無牛味得個肥字，鹿茸菇就幾好食好爽口。配料嘅芽菜韭菜同腐皮真係越嚟越少，腐皮得番一塊，芽菜韭菜有幾條咁，聽到隔離枱話全走，真係好想去夾埋過嚟。朋友叫嘅墨丸三哥酸辣湯米線，佢話五小辣啱啱好，好食喎。依然都係叫咗兩杯凍檸茶，正常味。