滿記甜品 (已結業)

基於我由細到大都係一個典型煙韌控，所以次次入糖水舖都首選芋圓仙草類。已經勁耐無食過充滿兒時回憶既滿記，發現原來滿記都多左好多唔同既甜品，見到檯面貼住新品既OREO鮮奶麻糬，雙眼發曬青光，但係感覺會好滯好甜，我地２個人係深夜又廢事食咁滯咁甜，最後叫左綠豆仙草芋圓同埋榴槤忘返。＜綠豆仙草芋圓＞＄４２一黎到既時候，我有少少失望既，雖然佢同圖片本身無乜太大出入，但佢無跟花奶，感覺有丁點失色，仙草唔夠動感，分不清涼粉仙草，芋圓煙韌可以，但又無乜芋頭香，紅豆味道帶甜，但又硬左少少咁，成碗野最滿意既地方就係個雪糕。＄４２咁小份量，係相當唔抵食。＜榴槤忘返＞＄４６當我食我碗芋圓令我失望既時候，好自然就向身邊既人既糖水出發，後來變成我狂搶食呢碗榴槤忘返，其實以前食過，但芋圓有對比後，就自然覺得呢碗野特別特別好食，佢３樣野加埋一齊個味道係超夾，而且佢既榴槤本身又好濃味好香，令到呢個甜品係我心目中又加分。糖水店黎講，價位稍貴，份量唔多，但如果間唔中食下，都可以接受既。夜晚都好多人食，所以預左無服務。