Sodam Chicken (已結業)

同朋友上網睇到呢間嘅🐔🐔好吸引，慕名而來，我哋叫咗個二人餐，揀咗焗雞，韓風紫菜拼黃金鹹蛋，跟餐仲有韓式涼拌水冷麵同埋泡菜魷魚,另外單點一份太陽芝士炸雞。太陽芝士炸雞係呢間餐廳嘅招牌菜，雞肉質感軟硬適中，而且微辣好惹味，外皮炸得脆脆，未點芝士就咁食都好好食🤤芝士最表面果層有拉絲效果，但芝士味冇咁重，裡面嘅芝士質感好稠，冇拉絲效果但味道香濃好多，點炸雞食好正！最後剩底滲透芝士嘅麵包，芝士味十足，麵包口感比較韌。焗雞方面，應該係炸過先去焗，可能因為焗過，焗雞嘅雞肉質感比較硬身，焗雞表面滿佈韓式紫菜味粉，鹹鹹地，要連埋紫菜碎一齊食先好食，唯一比較麻煩係紫菜碎容易跌。黃金鹹蛋表面濕濕地，食落冇咁乾，而且鹹蛋黃香味十分濃厚，值得一讚。😚韓式涼拌水冷麵，冷麵質感煙韌，十分彈牙，其實湯底味道好普通，但當我地食左好多炸雞，食番淡冷麵可以當中和一下油膩感覺。泡菜魷魚酸酸辣辣，同冷麵一齊食好開胃。👍🏻呢度嘅炸雞真係唔錯，好期待下次再黎試其他口味。