101肉燥飯專門店 (已結業)

想追查台灣美食極唔厭嘅原因，今日連101肉燥飯專門店都唔放過。唔想食米飯，所以叫咗米粉系列。鹽酥雞翼配台式肉燥新竹米粉，米粉份量超多，有理由相信係依照餐廳附近中學嘅學生發育期食量而設計。肉燥夠味，但可能放咗湯，感覺始終碎啲、油啲。鹽酥雞翼脆但無乜味，同正宗台式鹽酥雞嘅惹味程度差好遠。無骨香辣三杯雞新竹米粉，都係珍寶size。呢碗粉幾辣，幾鹹，但三杯雞應有嘅香甜同嫩滑就欠奉喇！裡面仲有肉燥同豆腐，兩個人share都可。飲品叫咗柑桔檸檬同埋珍珠奶茶。全部味道偏淡，叫做個餐搭杯台式飲品咁啦。調查結果係，想食極唔厭嘅，都係飛一轉福爾摩沙先得喇！但要經濟實惠咁食個飽，留港消費啦！