私家廚房 (已結業)

好耐無叫齊飯腳去食飯啦，今日難得叫齊人，所以就搵左呢間私家廚房，貪佢私隱度夠高，4人位會好似獨立廂房仔咁，食都食得特別開懷啦。4個人，因為大家都覺得肚餓，所以叫左7樣野左右，後尾發現食物份量都幾多，所以每人都仲可以打包一盒，第2日帶返工做lunch。其實全晚D野都唔錯，服務又好，揀幾樣特別推薦講下啦。籠仔荷葉海龍皇蒸飯：上面有齊魚蝦蟹，海鮮平均地鋪滿飯面，上檯個下聞到淡淡的荷葉香氣，而米粒就吸哂所有海鮮的精華，就連平時唔太食飯的我都覺得好好味。薑蔥焗美國桶蠔：未黎到已經聽到滋滋聲，上檯見到熱辣辣，大家就已經忍不住要起筷。蠔肉大大粒又飽滿，熟度控制得剛剛好，連同醬汁同食非常惹味。生炒骨：有驚喜，醬汁入口甜酸度適中，唔會甜到好奇怪，而排骨炸得脆卜卜而不油膩，果然係要新鮮熱辣即叩即炒最好味。