醉辣鮮 (天空之城)

營業中

休息中

過咗中秋，天氣涼涼地，最啱就係食蒸氣鍋，咁就去錦田天空之城嘅醉辣鮮。呢度可以免費泊車三個鐘，唔使周圍搵車位，最啱啲揸車人士。就算係錦上路搭小巴入嚟都係幾分鐘，所以非常之方便。我哋嗌咗$198嘅海鮮餐，海鮮有日本元貝、鮑魚、本地生蠔、蟶子、海中蝦、蜆。可以自己攞住個桶仔去揀海鮮，然後交俾職員清洗。海鮮生猛新鮮，味道好。前菜係椰子煲雞、溫泉蛋。雞湯清甜可口，好貼心將椰子切成薄片，可以食埋充滿椰香啲椰肉，一試就知冇加味精。溫泉蛋蛋白嫩滑，蛋黃味濃郁，半熟流心，正👍時令蔬菜任食，蔬菜有唔同種類：青菜，菇，粟米，番薯……紅棗杞子蟲草花蒸雞肉質嫩滑鮮甜，配搭養生有益嘅紅棗杞子蟲草花就更加錦上添花。海皇粥底有各種時蔬、海鮮，雞嘅精華浸住啲粥非常之鮮甜，冇得輸。最後仲奉上精美甜品——香芋椰汁西米露，糖水甜度啱啱好，充滿椰汁香味。我地再加購飲品～秋意濃濃，啱就快啲約埋家人朋友一齊去啦。