四姐川菜 (已搬遷) 新店位置

秋天涼咗, 唔係打邊爐就想食辣嘢暖吓胃, 朋友都係港島放工, 就約去呢間試試。每位220, 因唔同人數包唔同碟數, 分涼菜同熱菜, 加單就分別60同100一碟。價錢好似唔太平, 但食過都覺得值。其實餐牌可以揀嘅嘢都係熟口熟面嘅嘢, 蒜泥白肉, 夫妻肺片, 拍青瓜, 油泡, 水煮...但大家食完都好滿意, 因為除咗過足辣癮之外, 亦體會到佢哋嘅認真同功夫。水煮牛, 鍋巴都係滾住油咁上枱; 涼菜碟碟都係紅油伴碟但每碟又有不同味道, 有啲較麻, 有啲較甜, 有啲加酸; 有個唔知咩嘢蝦, 十足鑊氣, 連殼食卜卜脆; 總之每道菜有水準。出奇地食完都唔係覺得太辣, 不過都好嘅, 如果樣樣都好辣跟本食唔真啲味道。另外要讚服務好殷勤, 上菜又快, 碟碟賣相都睇得又好味。見佢上菜去唔同地枱, 碟頭都有因應人數多少而增加減少, 但份量都大嘅。不過我唔太鍾意啲牛肉用梳打粉乸得太林; 辣子雞入面太少雞。