熊貓甜品屋 (已結業)

晚飯後黎一個甜品，先算完美的一天。同一班朋友仔食完晚餐，個個都話要食甜品，於是去了朋友推介的熊貓甜品店，一到步已經見到超巨型熊貓係門外歡迎你。內部裝修以白色為主，感覺好乾淨，而且有好多熊貓裝飾，之後發現餐具都全部係熊貓，好有心意呀！鐘意熊貓嘅朋友一定要去潮聖！甜品種類超多，中式，西式，特色甜品都有，總有一款岩口味。我係門外已經決定一定要試榴槤班戟，一黎到已經好香榴槤味，切開一半，入面超多榴槤肉，啖啖榴槤味，而個皮係班蘭味，好夾，再加個雪糕球，呢個價錢確實抵食。友人點了楊枝金露豆腐花，滿滿芒果毫不遜色，芒果汁亦好香芒果味，豆腐花超滑，再加少少寒天，有咬口。友人話好好食。另外叫了老闆娘推介的熊貓杯，多款配類自選，見有椰皇果凍，出面都好少有，一於試下，黎到個賣相已經好吸引，師父應該落咗唔少心機。再試下個椰皇果凍，超清甜，好似飲緊椰皇水咁，再加上好似粒粒魚子咁嘅什果味爆爆珠，好似有唔同生果味一齊係個口入面，感覺好新鮮，細問下原來椰皇果凍係用天然椰皇水做，所以係超清甜，好似去咗泰國咁呀！總結: 一間不論裝修，餐具，甜品都咁用心去做嘅餐廳，真心推介，希望老闆娘繼續保持，我地會再黎探下熊貓們架！