稻坊 (曼坊) (已結業)

今日表弟約埋其他親友一齊喺美孚大姨媽屋企附近曼坊嘅「稻坊」一齊飲下午茶！我們叫咗珊瑚陳醋海蜇頭嘅質感相當爽滑彈牙，加埋啲陳醋一齊食，感覺好醒胃！酥皮叉燒包「就咁睇」表面好似幾靚以為會幾好食咁，但一撕開一半就見到入面嘅叉燒餡份量極之少，少到個包可以話係空心㗎，真係超「搵笨」呀！像生冬菇包嘅造型賣相真係好似一隻真冬菇咁，入面嘅餡料係切碎咗嘅冬菇粒，味道都幾惹味！尖椒糖心皮蛋係用雙色椒剁成碎粒舖喺皮蛋表面，至於皮蛋就唔算好糖心，質感比較硬同乾身，但味道都幾甘香！剁椒白豬手嘅豬皮質感好爽滑煙韌，配上香辣嘅剁椒一齊食，真係好惹味，而且唔會有好油膩嘅感覺！陳皮牛肉球嘅肉質好嫩滑多汁，牛肉味都幾濃郁，但就唔係好食到陳皮嘅味道！瑤柱冬瓜粒肉碎泡飯嘅湯底同冬瓜粒嘅味道好清甜，肉碎都幾大粒，可以叫係肉粒，質感亦好爽滑，而且份量都幾多！椒鹽鷄軟骨嘅外層炸粉唔係好厚身，而且炸到好金黃香脆，鷄軟骨嘅質感都幾爽脆，最值得一讚嘅係份量比我們預期中多！豉油皇肉絲炒麵嘅麵都幾香脆，雖然肉絲嘅份量都算多，但芽菜同韭黃嘅份量就超級多，多到舖滿整碟麵嘅表面！