Three Dice Kitchen (已結業)

今日行過銅鑼灣搵野食，一見到呢間立食份子料理店就比佢吸引左，餐牌上面有我一直想試好耐既水信玄餅，而且成日聽人講份子料理但一直都未有機會試到，諗都唔諗就即刻入去試啦！一入到去見到間餐廳細細間，有六個企位。裝潢都係簡潔為主，加埋餐廳既主打係份子料理，好有入左lab既感覺，都幾得意。佢既餐牌有三款水信玄餅揀，分別係原味，薄荷朱古力同玫瑰果園。我同朋友就揀左原味同薄荷朱古力。落完單就可以睇住店員整野食，水信玄餅係一早整好左既，店員會因應客人所選擇既口味加上伴碟。水信玄餅既賣相真係好靚！水信玄餅本身係無味道，但係凍冰冰，質地爽口，入口清涼，啱晒係呢啲咁熱既天氣食呀。原味既水信玄餅係最傳統既日本食法，配上黑糖糖漿同黃豆粉食，味道好夾。另一個薄荷朱古力味水信玄餅係配上朱古力醬同薄荷魚子醬。朱古力醬既味道啱啱好，唔會太甜，而一粒粒既薄荷魚子醬一入口已經即刻散發住淡淡既薄荷味，令到本身已經凍冰冰既水信玄餅更加冰涼，味道好醒神。下次再行過銅鑼灣一定要黎試埋佢既玫瑰果園水信玄餅先得！