金滿堂甜品

營業中

休息中

呢間舖頭唔知點講，都有啲感情嘅，記得六、七年前嘅中秋，我同一大班朋友，仲有而家係我老公嘅男朋友去舊啟德機場燒烤，玩到半夜之後行去九龍城搵糖水食，撞吓撞吓就去咗呢間店嘅第一代舖，當時仲係一個一百呎左右的舖頭，入面淨係得廚房，冇枱嘅，客人全部要坐係門口度食，我哋一行五、六人就是旦坐低咗，老板娘親自嚟招呼我哋，佢自己出咗啲燈謎貼咗喺牆度，同我哋一齊猜，又講佢開舖嘅理念，仲請我哋食佢當時最新的創意甜品－綠茶湯圓！之後我哋一路都成日去幫襯。但係自從佢搬咗大舖，又開埋分舖後，啲咁嘅場面都要變哂做回憶嘞，佢再唔會同啲客SOCIAL，淨係叫啲伙記做嘢，帶位，收錢，仲好似唔記得哂我哋咁，不過算啦，係咁架啦，時間改變一切！今日我同老公又嚟默默支持佢嘞，我哋叫咗： 榴槤飄香： 真係好有榴槤味，仲係好靚嘅榴槤添，又香，又濃，又甜，連我唔係好食榴槤嘅人都覺得好好味，我老公次次都叫呢個，食極都唔會厭！ 藍精靈：其實係刨冰，啲醬太甜嘞，記得要撈勻先好食，唔係會之前太甜，之後又太淡，無咩生果味，好似食緊糖水撈冰，我覺得好唔掂，唔值二幾蚊！唔推介！雖然老板娘起哂餅唔記得人，不過我都會繼續幫襯嘅，因為我上咗榴槤癮！