小南國 (已結業)

話說我已經懷孕快九個月，行路已經同隻龜無乜分別，所以都唔勉強出街堂食，老公放工買外賣返黎就算喇。今晚大肚婆好想食薺菜豆腐羹，於是買小南國返黎～老公係去到先口嗌，佢話唔係等咗好耐，15-20分鐘就有得拎。兩大一細叫咗都幾多嘢，有薺菜豆腐羹、四川擔擔麵、豆漿勝瓜、四喜烤麩、招牌炒飯、賽螃蟹。埋單$560!《薺菜豆腐羹》一如既往嘅好味，當然堂食熱啲又有埋胡椒粉係好食啲嘅，但係我一條友飲曬成碗 ：）《四川擔擔麵》湯同麵係分開盒裝，個麵餅太整齊，拎到返屋企都硬咗，要剪開浸喺湯幾分鐘先叫做林返啲，但個湯底好好好好味，夠辣，連肉碎都好惹味！滿分！《豆漿勝瓜》唔知點解啲豆漿好似起咗渣咁，好彩無乜點影響味道，係個賣相走咗樣。《四喜烤麩》呢個前菜外賣同堂食分別都不大，拎到返屋企依然好食！《招牌炒飯》第一次食，目測有蝦、蛋、肉碎、豆角粒、辣椒碎（極微辣，只有我兩歲女話辣），食落好似有咸蛋黃，然後唔知有啲咩材料，但好香好乾身唔咸，下次會再叫。《賽螃蟹》麻麻地，唔知係咪凍咗，所以啲蛋白硬硬地，感覺唔多好，不會再叫。Overall 外賣黎講算係唔錯喇～