麵包空間

營業中

休息中

話說早幾日晏晝同個老友經過何文田愛民邨，見到有間麵包舖，見到個舖面都非常企理，就入去八卦吓，點知有驚喜。你哋有冇見過或者聽過有種包叫做「餃子包」？小弟孤陋寡聞第一次見，仲特登去請教Google大神添。既然未見過，就買番個嚟試下。一啖咬落去，入面係有好豐富嘅忌廉芝士，因為個包本身係比較軟身，配合埋忌廉芝士簡直好味到不得了。價錢又公道，咁足料都係講緊$14，都真係好均真。至於點解個麵包嘅質地會咁柔軟同埋有彈性，我估計同佢哋嘅麵包係用咗「湯種法」製作有關係，因為我喺舖頭入面都見到唔止一次出現「湯種」呢個字眼。等我再一次問咗google大神之後，我先知道原來「湯種法」係一種日本傳統嘅烘焙技術。運用呢種技術，麵包嘅水份會增加，亦都會令到質地更加有彈性同埋柔軟。原來係用咗特別嘅方法炮製，怪唔知得同平時食開嘅麵包有咁大分別啦。我老友仲搞笑，見我食得咁滋味，即刻掉番轉頭話要買番個試下。佢食完之後都非常認同呢個「餃子包」，仲買多兩個俾屋企人試吓，知你錫屋企人啦老友。