巴辣仔烤魚

營業中

休息中

雖然烤魚呢樣嘢，好似喺香港流行咗好耐，但係原來我一次都未食過🤣今次想Farewell個朋友，佢話想食多啲亞洲菜，於是終於有機會嘗試食烤魚。因為我食魚好怕腥同有骨，所以揀咗一間喺香港有幾間分店嘅舖頭，而且仲標榜係活魚。除咗烤魚之外，餐廳仲有其他充滿四川風味嘅食物。我哋嗌咗爆檸酸菜烤魚，因為擔心太辣，所以只係叫左小辣，如果怕食辣嘅人可以揀唔辣。個魚好滑身好肥美，會feel到肥美嘅魚油，果然係新鮮嘅魚，真係一啲腥味都冇。而且除咗魚肚位有骨之外，其他位都冇碎骨，可以放心，啖啖肉咁食🥰另外我哋仲加左肥牛同埋薯粉，肥牛嘅油脂分布平均，容易咬開唔會太韌。薯粉配勁多嘅酸菜真係好好食😋除咗烤魚，我哋仲叫咗幾種串燒。只係叫咗BB辣，但係食落比個魚更辣🤣個人最鍾意雞翼同埋雞軟骨，好香孜然味，好正😋嘢飲方面，我哋嗌咗水果茶同埋金菠蘿，水果茶勁大杯，而且水果種類好多。見到有西瓜蘋果哈密瓜喺面。至於另一杯菠蘿特飲，個賣相都好靚，都幾驚喜嘅係菠蘿配淡淡嘅綠茶香味，好夾🥰最後食咗自助嘅冰粉，用嚟解辣啱啱好。